محتاجالك!

محتاجة لحد يحبنى بجد
ارمى همومى جوه حضنه
ويمسح دموعى من ع الخد

محتاجالك ياحبيبى
يااللى مش عارفة انت فين
محتاجالك تحمينى من غدر وقسوة السنين
اتولد لما اشوفك ولما تبعد اموت حنين

محتاجالك تبقى ضلى
ابقى شمسك وانت قمرى
اتنفسك واتنهدك

واوهبلك كل عمرى

محتاجالك ونفسى اشوفك
المسك واحضن كفوفك
اهمسك وانطق حروفك
نفسى حتى يزورنى طيفك

بكل جنون الأرض

بحبك بكل جنون الأرض

بحسك قريب برغم البعد

وقلبى ياقلبى معاك ع الوعد

ومهما هيحصل هنفضل لبعض

بحبك بقلبى وروحى وكيانى

ياعشقى الأخير والأولانى

يانبضى وهمسى وسر حنانى

فى حضنك وبس بنسى زمانى

ولما تغيب بموت بالبطىء

وقلبى كانه مركب غريق

ماهوانت القريب والحبيب والصديق

بحبك بحبك بحق وحقيق

ازمة أم غضب من الله؟!

من منا لم يتابع ولا زال يتابع بترقب وقلق وبعض الدهشة ,الازمة الاقتصادية التى يمر بها العالم الان .
ربما نحن العرب لم نلتفت لها كثيرا لاننا نعيشها منذ سنوات فهى ليست امرا جديدا علينا.
ولكن الجديد ان هذه الازمة اهتزت لها بلدان هى الاقوى فى العالم اقتصاديا (امريكا-فرنسا-انجلترا......الخ)وحتى الصين لم تنجو ولو بالقليل من توابع هذه الازمة.
ويقال انها الاعنف ربما منذ نشأة هذه الدول.
اذن نحن امام ازمة حقيقة لا يعلم مداها الا الله .
تأملت كثيرا هذه الازمة ووجدت انها غضب من الله فالجميع يعانى من ارتفاع الاسعار الجنونى الذى يتزايد يوما بعد يوم ,نعانى من جشع التجار الذى فاق كل الحدود.
نعم وصل التجار الى حالة من الجشع والسعى وراء المال بكل الطرق غير عابئين بما آل اليه حال الشعب من فقر وضعف مرتبات.
وساعدهم على ذلك الحكومات التى تقف مكتوفة الايدى بل ربما تساعدهم فى جشعهم هذا.
ونظرت الى حالنا مع بعضنا البعض فماعادت علاقاتنا الانسانية سواء اكانت صلة دم ام غيرها من العلاقات لها قيمة انهارت كل انسانياتنا امام المال ومطامع الحياة,ان وجدت.
وعلى الجانب الآخر نظرت الى ما قامت وتقوم به امريكا فى فلسطين ,لبنان,دارفور,افغانستان واخيرا العراق .
اعتقد ان هذه الازمة كان لابد ان تحدث ربما هى انذار من الله للبشر الذين اصبحوا بلا قلب ولا ضمير ولا اخلاق.
لا نملك سوى ان ندعو الله ونصلح من احوالنا لنواجه ازماتنا.

لسه الاحلام ممكنة

اشكر اللى سأل عنى فى غيابى اللى طول شوية

انا كنت فى اجمل واطهر مكان على وجه الارض كنت بعمل عمرة والحمد لله ربنا اكرمنى وحققلى اهم حلم فى حياتى انى ازور الكعبة

كان شهر بالعمر كله اكتشفت فيه حاجات كتيرة وجميلة ومهمة اكتشفت نفسى واكتشفت غيرى وبقيت اقول من قلبى الحمد لله على نعمة الاسلام والعبادة هناك العبادة ليها طعم واحساس تانى

اول زيارة ليا للكعبة كانت يوم وصولى هناك روحت انا ووالدتى واخويا نعمل العمرة حسيت برهبة وانبهار وانا قدام بيت ربنا وبكيت وربنا اكرمنى ولقتنى بقرب للكعبه رغم ان كان فى زحمة كبيرة بس ربنا اكرمنى ولمست الكعبة بالتحديد الركن اليمانى وبوسته

ياااااااااه احساس رائع يارب كل مسلم يروح هناك عشان يعرف انه فى نعمو اتحرم منها غيره

الختام كان فى المدينة وزيارة الرسول عليه الصلاة والسلام والحمد لله برضه ربنا اكرمنى بالصلاة فى الروضة الشريفة ودى حاجة مش بتحصل لناس كتير الحمد لله

ربنا يتقبل ويوعد كل اللى نفسه يروح واللى حتى مش عايز ربنا يهديه ويعرف ان اجمل حاجة ممكن تحصله هى زيارة الكعبة والرسول عليه الصلاة والسلام

اجبنى برب السماء!

حبيبى اجبنى برب السماء

لماذا كتب علينا الشقاء

فراق وبعد ووجع وداء

وانت طبيبى وانت الدواء

وانت المنى وكل الرجاء

ايا دفء قلبى ببرد الشتاء

ايا قمراً يرافقنى كل مساء

كثير على قلبينا هذا العناء

ان كنت جرحى لا ارجى الشفاء

فحبك يسرى داخلى مسرى الدماء

يامن توجتنى على عرش النساء

واحتليت قلبى وروحى بكل دهاء

من يظن ان ساهجرك

فهو اغبى الأغبياء

هرسم حلمى!

اهداء\الى صديقتى التى تعرف نفسها!

انا هرسم حلمى بايدى

وهحاول اوصل ليه

مش هستنى حد يحلملى

او يرسملى طريق امشيه

بارادتى هتغلب على ضعفى

واتحدى الصعب واخطى عليه

مش هنسى وانا ماشية حبايبى

ولا يوم راح ادوس على قلبى

والكون هيكون جنة

فى عنيا المر هحليه

وهساعد غيرى ومش هنسى

ان الخير ده باقيلى فى نفسى

ربنا راح يجازينى عليه

الندم!!!

لا تندم على مافات.

لا تندم على خير قدمته لمن لا يستحق, فهو رصيد سيبقى لك عند الله.

لا تندم على حماقة ارتكبتها,ولا على فعل قمت به مهما كان سيئاً, فالله يقبل التوبة ولديك الكثير من الخير لتقوم به فتمحو اى خطا ارتكبته بل وتحوله الى حسنات.

اندم على خسارتك لأشخاص لم تعرف قيمتهم,الا عند خسارتهم,

هنا اندم كثيراً...

اندم على مامضى من عمرك,الذى اضعته هباءاً لأنك ستحاسب عليه ’ولأنه سيترتب عليه كل ماهو آت.

هنا ايضاً اندم كثيراً......

فالحياة بخيلة لا تمنحنا الا القليل من الفرص,

اندم ان لم تقتنصها.........

24 سنة

بمناسبة مرور 24 سنة على وجودى فى الحياة بالتحديد يوم 3 اغسطس كملت 24 سنة ولله الحمد كلهم شبه بعض اللهم لاحسد

كتبت السنة اللى فاتت فى عيد ميلادى ال23 حاجة كده عبيطة شوية وبما ان ال24 زى ال23 مافيش تغيير غير بس فى الرقم اللى قدام العشرين هنزل اللى كتبته السنة اللى فاتت مع تغيير 23 الى 24

بقالى من زمان عايشة
24 سنة بالظبط
لامرة قولت كفاية
ولا حتى يادنيا زهقت
ولا بيأس ولا استسلم
بقع وبقوم وبتعلم
وطول ما انا عايشة بتكلم
واقول الحق ولا يوم خفت
حلمت كتير وأحلامى
روتها بدم أيامى
وشوفتها بتكبر قدامى
وبتموت منى فى ثوانى
واقول معلش واحلم تانى

وواقفة ثابتة فى مكانى
ولااتكسرت

أمانة عليكى يا سنينى
ماتنسينى
وبالأفراح تواسينى
وتمسحى دمعى من عينى
أنا م الدنيا ياما شربت
24سنة بالظبط

خيط عنكبوت

الحزن كاسى كل شىء

حتى الشوارع والبيوت

متلونة بلون الألم

وكأنه خيط عنكبوت

الحزن بقى زى الهوا

مرض عضال ومالوش دوا

مزروع مابين الضلوع

لو عشنا من غيره نموت

الحزن حضنه يساع كتير

فى وجوده يبقى الشوف ضرير

والحلم يصبح طيش شباب

والحب نسمة ربيع بتفوت

بيان من قلب اتملى احزان

اوعوا تفتحوا للحزن البيبان

ده لو سكن جوه القلوب

هيخلى اى كلام سكوت

هتنزل المرة دى

ازاى انسان يكون مؤمن بأرائه وافكاره وفجاة بعد عمر طويل يغيرها او بمعنى اصح يقول عكس اللى جواه وينافق رغم انه من جواه مقتنع انه بيكدب .

محمد صبحى بالنسبة ليا قدوة ومثل وبحترمه جدا ومؤمنة بيه جدا وسعيدة بمواقفه من الرئيس والحكومة وكل اللخبطة اللى فى مصر.

لما استضافته منى الشاذلى فى العاشرة مساءا الحلقة عملت صدى كبير جدا عند الناس وكان فى قمة الجراة والصراحة وقال ارائه بكل شجاعه.

للأسف النهاردة شفته فى برنامج 90 دقيقة مع معتز الدمرداش وحسيت انى بشوف واحد تانى مش محمد صبحى اللى عارفاه وبحترمه وبحبه بكل النفاق والكدب قال(انا مش ضد رئيس دولتى بالعكس انا بحبه وعارف انه بيحبنى وبيحب الشعب المصرى وبيحب مصر وبيخاف عليها ............)

لغاية كده كفاية اوى لما مبارك بيحب مصر امال مين اللى بيكره مصر بشعبها بكل حبة تراب على ارضها ومين اللى وصل مصر للى هى فيه.

مش مبرر يا استاذى سابقا انك فى القائمة السوداء عند الحكومة وان مسلسلاتك بتتحارب وبتتمنع مش مبرر انك تمسح كل كلامك وتشوه صورتك فى عيون كل اللى بيحبوك وبيحترموك.

قناعاتك وحب الناس ليك هو الباقى مش اى حاجة تانية.

يبقى مااقدرش اعيب على الشباب اللى اتبهدل فى امن الدولة وخسر عينه واتهان واتذل هو واهله ومش هيقدر يعمل اى حاجة وهيمشى جنب الحيط .

شكل الحكومة ايدها طرشة اوى وتقيلة اوى.

ولا عزاء لعبد الفتاح القصرى وكلمته الشهيرة(هتنزل المرة دى)

وهو الكلام عليه جمرك وكلام الليل مدهون بالزبدة يطلع عليه النهار يسيح.

خسارة يااستاذى سابقا .

مركب ورق

أنا واحلامى مركب ورق

بيقاوم الموج والغرق

مجدافـــى قلبـــــــــى

من غيره يغرق مركبى

ياشمسى اوعاكى تغربى

انتى ونيسى فى وحدتى

ومصبرانى على غربتى

ومقويانى على دنيتى

انا صحيح مركب ضعيف

مش قد بحر غريق مخيف

فيه الربيع زى الخريف

ضيع طريقى من زمــــــان

مالوش بر ولا له امان

موجة تشيلنى وموجة ترمينى لبعيد

الشط ضاع منى اكيد

ومركبى محتار شريد

لكنى مجدافى عنيد