ازاى انسان يكون مؤمن بأرائه وافكاره وفجاة بعد عمر طويل يغيرها او بمعنى اصح يقول عكس اللى جواه وينافق رغم انه من جواه مقتنع انه بيكدب .
محمد صبحى بالنسبة ليا قدوة ومثل وبحترمه جدا ومؤمنة بيه جدا وسعيدة بمواقفه من الرئيس والحكومة وكل اللخبطة اللى فى مصر.
لما استضافته منى الشاذلى فى العاشرة مساءا الحلقة عملت صدى كبير جدا عند الناس وكان فى قمة الجراة والصراحة وقال ارائه بكل شجاعه.
للأسف النهاردة شفته فى برنامج 90 دقيقة مع معتز الدمرداش وحسيت انى بشوف واحد تانى مش محمد صبحى اللى عارفاه وبحترمه وبحبه بكل النفاق والكدب قال(انا مش ضد رئيس دولتى بالعكس انا بحبه وعارف انه بيحبنى وبيحب الشعب المصرى وبيحب مصر وبيخاف عليها ............)
لغاية كده كفاية اوى لما مبارك بيحب مصر امال مين اللى بيكره مصر بشعبها بكل حبة تراب على ارضها ومين اللى وصل مصر للى هى فيه.
مش مبرر يا استاذى سابقا انك فى القائمة السوداء عند الحكومة وان مسلسلاتك بتتحارب وبتتمنع مش مبرر انك تمسح كل كلامك وتشوه صورتك فى عيون كل اللى بيحبوك وبيحترموك.
قناعاتك وحب الناس ليك هو الباقى مش اى حاجة تانية.
يبقى مااقدرش اعيب على الشباب اللى اتبهدل فى امن الدولة وخسر عينه واتهان واتذل هو واهله ومش هيقدر يعمل اى حاجة وهيمشى جنب الحيط .
شكل الحكومة ايدها طرشة اوى وتقيلة اوى.
ولا عزاء لعبد الفتاح القصرى وكلمته الشهيرة(هتنزل المرة دى)
وهو الكلام عليه جمرك وكلام الليل مدهون بالزبدة يطلع عليه النهار يسيح.
خسارة يااستاذى سابقا .
هناك 12 تعليقًا:
والله يادينا مش قد صدمتى انا كنت فى حالة ذهول قدام التليفزيون بجد صدمة كبيرة جدا ولحد الوقت مش مستوعبة ومش مصدقة بس فعلا احنا فى زمن كل شىء فيه متوقع
ربنا يصبرنا على اللى جاى ويثبتنا على الحق
العزيزة .. ايمان .. دمتي في حفظ الله ورعايته
أعتذر عن التأخير والمتابعة ..
العزيزة ايمان ..
أول ما وصلت ورأيت صورة الفنان القدير .. محمد صبحي .. فرحت جداً وكان أملي إني حاشوف موضوع غاية في الأهمية .. خاصة أنا من عشاق فن محمد صبحي وهو مثل أعلى في الفن المسرحي ..
وبعد قراءتي للموضوع شعرت بصدمة قاسية.. تفوق أي وصف ..
ولكن .. ماذا نقول ..
تقبلي أطيب تحياتي
كل ده عشان قال الريس بيخاف على مصر
دى سياسة
والسياسة لاتعرف المشاعر
بس اقلك حاجة محمد صبحى مش منافق
بس دى سياسة
السياسة انك تهاجم الفعل متهاجمش الشخص
واللى عمله اللى انا مشفتوش بس طبقا لقولك صح جدا
لو حسبتيها بالعقل والمنطق مش بالمشاعر
القلب النابض
سعيدة بمرورك وتعليقك جدا
بالفعل هى صدمة لم افق منها حتى الان ولكننا فى زمن كل شىء فيه متوقع
الاخ مدحت
شوف هو فى الاساس فنان يعنى غالبا الفنان بيحاول يبعد عن السياسة بقدر المستطاع عشان مايدخلش فى متاهات ومشاكل بس محمد صبحى اختار انه يمزج فنه بالسياسة وبعدين كان فى برنامج العاشرة مساءا قمة فى الجراه وانتقد الرئيس طبعا بشكل غير مباشر بس واااااااضح جدا
يبقى مايجيش يغير كل اقواله يبقى مش ذكاء نفاق
مش حقولك أعذريه ولا حقولك سامحيه ولا حقولك ارفعيه تانى لنفسه مكانته عندك....أنما حقولك تخيلى واحد خلاااااص معدش عارف يشتغل وده اللى احنا شايفينه يعنى بالبلدى زى ما بيقولوا فى بورسعيد عندنا مش عارف يسترزق...مالوش صنعه تانيه ياكل منها عيش ....ده غير اللى احنا مشفنهاش ولا عرفناه واللى اكيد حصل من ورا الكواليس بينه وبينهم....من أجل ذلك بقولك متدبحيهوش وسيبيه يطاطى للريح شويه من غير مايموت ويمكن فى يوم تانى يرجع يقف زى ماكان....شكرا وتحياتى
الاستاذ محمد داوود
اولا سعيدة اننا بلديات
شوف انا صدمتى على قد احترامى وحبى وتقديرى ليه
انا لما بحب فنان وده قليل جدا انه يحصل مش بس بهتم بيه كفنان لا بهتم بشخصيته واراؤه ومواقفه
انا واثقة انه اتعرض للكتير وحكومتنا طبعا ماتتوصاش بس برضه ماكانش لازم يقول كده
انا اكيد مش هكرهه ولا هقاطعه بالعكس هفضل اتابعه بس اكيد مابقاش محمد صبحى اللى انا عارفاه
ايمان
الله اعلم بالقلوب برضه
مش بحب انا اتهام حد الصراحة
بس كدة
تحياتى ليكى
اهلا ايمان اسف جدا علي التاخير بس هي الظروف السبب الحمد لله
انا طبعا سمعت الحوار واكيد عمر الراجل ما هيقول ان حسني مبارك حلو او هيخوض في السيايه بشكلها السلبي او هيقول شئ مش منطقي لكن الواضح انه فيه غسيل مخ حصل وبعدين ليه تنصدمي فاقد الشئ لا يعطيه الامور دي بقه طبيعيه والافكار بتتغير والنفوس بتتغير
يبقي فاضل ايه علي الاخلاق دا ان كانت موجوده اصلا ....جمعه مباركه...اللهم ارحمنا فانك بناراحم ولا تعذبنا فانت علينا قادر والطف يا رب العالمين
الاخ\مدحت
فعلا ربنا اعلم بالقلوب وانا لما قصدت انه بينافق لان النفاق ان الشخص يظهر عكس مايبطن واللى عيعرف محمد صبحى كفنان طبعا وانسان حتى معرفة سطحية وده واضح من اعماله ان اللى قاله عكس اللى جواه واللى هو مقتنع بيه ومااتغيرش لحد الوقت بس الله اعلم اتعرض لايه عشان يقول الكلام ده
اهلا مجد
شوف غسيل مخ ده يتعمل لشاب صغير فى مقتبل العمر مش انسان كبير وناضج وكون اراؤه ومبادئه من سنين وله خبرات كبيرة فى الحياة
ربنا اعلم باللى حصل بس ده مش كلامه ولا هو مقتنع بيه
إيمان
رغم إختلافي معاكي
الا اني معجب جدا باسلوبك
سواء في الكتابة .. أو في الحوار
بتناقشي بقوة
متمسكة برأيك
وده يبين ان رايك مبني على قناعات وخبرات سابقة
مش مجرد حالة مزاجية وقتية
باحييكي رغم اختلافي معاكي
فالخلاف في الرأي لايفسد للودن قضية
ولا اييييييه
تحياتي
إحســـان معارضة
إرسال تعليق